Er ferðaþjónusta málið? Greining á hlutverki Vegagerðarinnar í sjálfbærri uppbyggingu áfangastaða og ferðaleiða á Íslandi

Rannsóknamiðstöð ferðamála hlaut styrk úr Rannsóknasjóði Vegagerðarinnar í ársbyrjun 2023 fyrir verkefninu: Er ferðaþjónusta málið? Greining á hlutverki Vegagerðarinnar í sjálfbærri uppbyggingu áfangastaða og ferðaleiða á Íslandi.

Þróun ferðaleiða um landið nýtur aukinna vinsælda og byggir á samstarfi mismunandi aðila. Markmið rannsóknarinnar er að greina hlutverk Vegagerðarinnar þegar kemur að uppbyggingu áfangastaða og ferðaleiða á Íslandi. Auk þess verður rýnt í ákvarðanatökuna og verkferlið við þróun nýrra ferðaleiða.

Þær spurningar sem leitast verður eftir að svara eru: Hvaða hagaðilar koma að ákvarðanatöku  vöruþróunarferlisins og hvernig er samtalið þar á milli? Hverjar eru helstu áskoranir og  ávinningur ólíkra hagaðila við uppbyggingu og viðhald ferðaleiða á Íslandi?

Í rannsókninni verða skoðaðar þrjár ferðaleiðir sem hafa verið þróaðar af áfangastaðastofum landshlutanna. Þær eru:

• Norðurstrandaleiðin: sem er 900 km leið um norðurströnd Íslands og opnaði formlega árið 2019.
• Vestfjarðaleiðin: sem er 950 km leið um Vestfirði og opnaði við opnun Dýrafjarðarganga árið 2020.
• Eldfjallaleiðin: sem er ný 540 km leið um suðurströnd Íslands og hefur ekki enn verið formlega opnuð.

Rannsóknin er viðtalsrannsókn þar sem tekin verða viðtöl við helstu hagaðila ferðaleiða. Verkefninu lýkur með lokaskýrslu til Vegagerðarinnar í janúar 2024.

Ása Marta Sveinsdóttir [asamarta@rmf.is], Eyrún Jenný Bjarnadóttir [ejb@rmf.is] og Guðrún Þóra Gunnarsdóttir [gudrunthora@rmf.is] fara með umsjón verkefnisins.