UPLIFT: Tækifæri í bókmennta- og kvikmyndaferðaþjónustu leyst úr læðing

RMF tók þátt í evrópska samstarfsverkefninu „Unlocking the Potential of Immersive Literary and Film Tourism in Europe“ (UPLIFT), sem hlaut tveggja ára styrk (2024–2026) úr Erasmus+ áætlun Evrópusambandsins. RMF leiddi verkefnið fyrir hönd Háskólans á Akureyri en aðrir samstarfsaðilar voru fimm fyrirtæki og menntastofnanir frá Írlandi, Danmörku, Litháen og Slóveníu.

Markmið UPLIFT var að efla þekkingu, færni og nýsköpun á sviði gagnvirkrar bókmennta- og kvikmyndaferðaþjónustu í Evrópu og styðja ferðaþjónustuaðila við að nýta stafræna tækni á borð við sýndarveruleika (VR), viðbótarveruleika (AR) og gervigreind (AI) í sínu starfi. Á verkefnistímanum þróuðu samstarfsaðilar fjölbreytt fræðsluefni, söfnuðu dæmum um góða starfshætti og héldu vinnustofur með það að markmiði að brúa bilið milli fræðilegrar þekkingar og hagnýtrar notkunar gagnvirkrar tækni í bókmennta- og kvikmyndaferðaþjónustu.

Allt fræðsluefni UPLIFT sem þróað var má nálgast í opnum aðgangi á heimasíðu verkefnisins.

    1. Rannsóknarskýrsla(EN, IS, DK, LT, SLO): Þessi skýrsla skoðar hvernig viðbótarveruleiki (AR), sýndarveruleiki (VR) og gervigreind (AI) eru að breyta því hvernig við nálgumst menningararf sem tengist bókmenntum og kvikmyndum. Skýrslan kortleggur helstu þróun, tækifæri og áskoranir á þessu sviði í ferðaþjónustu og menntageiranum.
    2. Samantekt af góðum starfsvenjum(EN, IS, DK, LT, SLO): Ríkulegt safn af raunverulegum dæmum víðsvegar að úr Evrópu sem sýnir hvernig stafræn og gagnvirk tækni er nú þegar notuð til að auka upplifun gesta. Allt frá bókasöfnum til alþjóðlegra kvikmyndahátíða, samantektin býður upp á fjölbreyttar hugmyndir að áhugaverðum og gagnvirkum viðburðum.
    3. Fræðslumyndbönd(EN): Fjögur stutt og hagnýt fræðslumyndbönd sem leiða áhorfendur frá stefnumótun og hugmyndavinnu yfir í hagnýta notkun gagnvirkrar tækni í ferðaþjónustu. Fjallað er um markaðssetningu og vörumerki, notkun VR, AR og XR, gerð einfaldra sýndarveruleikaupplifana og skapandi notkun QR-kóða, með áherslu á aðgengilegar og raunhæfar lausnir. 
    4. Vinnustofur og verkfærakistur(EN, IS, DK, LT, SLO): Fjórar hagnýtar vinnustofur og fjórar verkfærakistur sem, ásamt fræðslumyndböndum verkefnisins, hjálpa þátttakendum að þróa hugmyndir og setja í framkvæmd. Efnið er sérstaklega sniðið að þörfum lítilla og meðalstórra fyrirtækja og tekur mið af mismunandi fjárhagsramma, tækniþekkingu og aðgengi að björgum.
    5. Leiðbeiningar fyrir kennara og þjálfara(EN): Leiðbeiningar UPLIFT eru ætlaðar kennurum og þjálfurum og veita hagnýtan stuðning við að nýta fræðsluefni verkefnisins í kennslu og þjálfun á sviði gagnvirkrar bókmennta- og kvikmyndaferðaþjónustu. Þær sýna hvernig hægt er að velja, samþætta og aðlaga rannsóknir, vinnustofur, verkfærakistur og fræðslumyndbönd að ólíkum markhópum, tíma og tækniþekkingu.

 

Verkefnið og fyrstu afurðir þess voru kynntar á alþjóðlegri ráðstefnu um menningartengda ferðaþjónustu í dreifbýlum, haldin í húsi Eddunnar 30.maí 2025 á vegum Rannsóknarseturs skapandi greina. Hægt er að horfa á kynninguna HÉR og pallborðsumræður eftir hana HÉR.

Út komu tvö fréttabréf um framvindu verkefnisins:

Frekari upplýsinga um verkefnið má finna á heimasíðu og samfélagsmiðlum þess:

Vera Vilhjálmsdóttir er verkefnastjóri fyrir hönd RMF.