Viðhorf ferðamanna til virkjana og mannvirkja við Kárahnjúka

Sumarið 2025 stóð RMF fyrir spurningakönnun á viðhorfum ferðamanna til virkjana og annarra mannvirkja á starfssvæði Fljótsdalsstöðvar á Austurlandi. Markmið könnunarinnar var að varpa ljósi á upplifun ferðamanna af svæðinu og meta áhrif mannvirkja á upplifun þeirra. Verkefnið er framhald af sambærilegri könnun sem fram fór á Blöndu- og Þjórsársvæðum sumarið 2024.

Niðurstöður könnunarinnar, sem fór fram við Kárahnjúkastíflu, sýndu að meirihluti ferðamanna kom til að upplifa náttúru og óbyggð víðerni og að upplifun af svæðinu var almennt mjög jákvæð. Mannvirki á svæðinu höfðu að jafnaði ekki neikvæð áhrif á ferðaupplifun en stíflan og virkjunin sjálf voru mikilvægur hluti af upplifuninni.

Skýrslu um niðurstöður könnunarinnar má finna hér á heimasíðu RMF.  

Í skýrslunni var einnig gerður samanburður við fyrri rannsóknir RMF við Blöndu, Þjórsá og Þeistareyki. Sá samanburður sýnir að upplifun ferðamanna af virkjanasvæðum er fjölbreytt og mótast af staðbundnum aðstæðum, landslagi og samhengi. 

Rannsóknin var unnin fyrir Landsvirkjun. Gagnaöflun var í umsjá Vatnajökulsþjóðgarðs en Eyrún Jenný Bjarnadóttir stýrði rannsókninni fyrir hönd RMF.