Ferðamannalandið Ísland – með sjálfbærni og sanngirni að leiðarljósi?

Rannsóknamiðstöð ferðamála, í samstarfi við Háskóla Íslands og Háskólann á Hólum, stendur fyrir pallborðsumræðum um ferðamál fimmtudaginn 30. október kl. 13:30-15:00 í Háskólabíói 2.

Umræða um ferðaþjónustu og ferðamál á Íslandi hefur verið áberandi á undanförnum vikum. Þannig var til dæmis 104. tölublað Heimildarinnar lagt undir umfjöllun um ferðaþjónustu undir forsíðufyrirsögninni: Ferðamannalandið Ísland: Sáu ferðamenn í fyrsta sinn sem plágu. Í fókus var ferðaþjónustuþorpið Vík í Mýrdal en einnig var almennt fjallað um gjaldskyldu á bílastæðum, öryggismál, átroðning ferðamanna, lúxusferðamennsku og álag á heilbrigðisþjónustu og löggæslu. Ferðaþjónustuaðilum fannst mörgum sem þetta væri einhliða umfjöllun og jákvæðar hliðar aukinnar ferðamennsku lítt dregnar fram.

Í pallborðinu verður fjallað á gagnrýninn hátt um það hvernig megi stýra, skipuleggja og þróa íslenska ferðaþjónustu með sjálfbærni og sanngirni að leiðarljósi. Þátttakendur verða fulltrúar greinarinnar, ríkis – og sveitarfélaga sem og háskólasamfélagsins og fjölmiðla.

Þátttakendur í pallborði

• Rannveig Ólafsdóttir, prófessor í ferðamálafræði við Háskóla Íslands
• Ingibjörg Sigurðardóttir, deildarstjóri ferðamáladeildar Háskólans á Hólum
• Arnar Már Ólafsson, ferðamálastjóri
• Ásta Kristín Sigurjónsdóttir, framkvæmdastjóri Íslenska ferðaklasans
• Pétur Óskarsson, formaður Samtaka ferðaþjónustunnar (SAF)
• Kristinn Jónasson, bæjarstjóri Snæfellsbæjar
• Jón Trausti Reynisson, blaðamaður og framkvæmdastjóri Heimildarinnar

Umræðustjóri: Guðrún Þóra Gunnarsdóttir, forstöðumaður Rannsóknamiðstöðvar ferðamála

Pallborðið er hluti af dagskrá Þjóðarspegilsins, árlegrar ráðstefnu félagsvísindasviðs Háskóla Íslands og öll eru velkomin.